Nebas Pendam SDNU Siol Kandis

Sun, 17 May- Pagi tadi bisi enggau urang nebas pendam Kampung Siol Kandis, pengawa tu di ator Komiti Pendam, SDNU pampang Siol Kandis. Sida begerah ba RTM mesan ngagai sapa ti bisi ngena pendam nya datai meresi kubur apai indai/kaban belayan diri empu, seninjik ga bisi ninga pesan, manah agi pendam tumu dibersi awakka semina nganjung bunga/nungkun dian semak hari Gawai ila.

Maya ka nebas ba pendam tadi aku bisi betemu enggau Thomas Tegong Laka, veteran announcer RTM bagian Iban. Lama kami duai berandau, iya tu suba bekas jiran aku ba Siol Kandis.

Begambar enggau Thomas Tegong Laka ba Pendam SDNU Siol Kandis

Bala kaban SDNU nebas kawasan pendam ngena bushcutter

Pendam SDNU Kampong Siol Kandis tu terubah iya dikena dalam taun tujuh puluhan. Majoriti ke ngena pendam tu urang Kristian Anglican tang urang Kristian bukai ari Gerija Katholik, SIB enggau Pagan pan bisi mega tau ngena Pendam tu selagi sida urang asal ba Kampung Siol Kandis.

Al-kisah Buah Jambu

Diatu pun jambu kami ke ba tisi rumah benong bebuah, penundi iya bebuah maya Hari Christmas taun nyin kemari. Jambu bansa tu enda bemusing tang pun ke ditanam entua aku ditu baka ke bebuah dua kali setaun. Sekali tu lebat agi buah iya peda aku, enti di itung anggar aku bisi dalam 300 igi, sekeda dan iya agi bebunga.
Jambu Ai, baru mansau

Pun Jambu, tanah enda besai semina nanam sepun aja
Pemesai buah iya kira kira 5 – 6 cm, asai iya sedang pemanis, nyamai endar enti di empa ngena garam, tauka sambal belacan.

Aku ngambar pun enggau buah jambu tu berengkah ari bulan tiga, terubah iya maya iya baru bebunga, ka meda penyampat iya besai, kira ngaga kajian meh keno jaku. Ari perati aku, buah jambu tu tau diambi selepas 7-8 minggu udah iya bebunga. Aku ngambar iya tiap ari enam tauka ari minggu.

28 March 2009, baru bebunga

11 April 2009, bunga mechah keluar

11 April 2009, burak tanah laban bunga gugur

18 April 2009, lepas bebunga, jai gamal iya

26 April 2009, udah bisi buah mit mesai tunjuk

2 May 2009, buah udah besai mimit, geram ati ka ngetil

9 May 2009, apin cukup besai, agi kelat enti dempa

17 May 2009, At last udah tau dikarang

17 May 2009, nasib endar ga pun enda tinggi, nyamai di jengkau ari tanah

Pun jambu tu udah ditanam kira kira 3-4 taun, peninggi iya kira kira 12 kaki, enggi kami tu nadai entu dibaja, tang ok ga gamal pun iya. Ambika pakai diri empu cukup, bisi ga diberi dibagi mimit ngagai kaban ke mansa datai kerumah.

Anugerah Pekerja Cemerlang 2009 - Jatan Kidu

Aku deka meri tahniah enggau pengaga ati ngagai Jatan anak Kidu ke udah bulih gelar Anugerah Pekerja Cemerlang 2009 (Category OKU). Gaga enggau rindu ati laban iyatu pangan aku, sama enggau kerja ba Telekom (TM) lalu kelebih agi pemenang Anugerah Pekerja Cemerlang taun tu bansa kitai Dayak. Menua asal ari Serudit, Paku, Spaoh.

Jatan nerima Anugerah tu kena 2-5-2009, bisi pansut ba TV1 sarinya maya tengahari ngayanka Jatan nerima Piala ari Prime Minister kitai, DS Najib ba Bukit Jalil, KL.
Jatan nerima trophy Anugerah Pekerja Cemerlang ari Najib

Jatan begambar enggau pemenang bukai

Kami dua En Jatan sama sereta ngelapur diri kerja ba Jabatan Telekom taun 1983, sama enggau urang kursus masang kabel dalam/baruh tanah, tang penemunya nadai kala dikena kami duai. Dalam kadang 26 taun kerja ba Telekom kami dua mayuh betukar unit, kadang kadang begulai, diatu enda sama Unit. Taja nadai agi begulai upis, aku nemu Jatan endang patut nerima Anugerah Pekerja Cemerlang, walaupun iya tu betaraf OKU, iya diberi kerja sebaka enggau urang bukai. Suah agi produktif ari sida ke bukai.

Sama sama sigat, Jatan (left) and myself. Aku biak setaun tang besai mimit aja ari iya

Nitih ke rita ari iya empu, sarinya iya nerima ari DS Najib piala siti, certificate enggau pala agung .. RM RM meh nya. Bisi dikena ujung bulan tu enggau pun bulan enam ila.

Snippets/Soundbites 20090513

Nampung kenang pekara ti nyadi tauka selalu disebut kemaya ari tu.

1. Selsema Babi
Rega manuk diatu niki, makin mar ketegal mensia jarang tauka ngelaung ke dagin janik Tang ba kedai kopi mi kolok enggau kway chap agi laku.

2. Altantuya
Nadai agi ninga rita sida tiga iko tambab ke mai kek birthday ngagai Putrajaya. Semua sida iya 30 iko ari raban ke ngelar diri Solidariti Anak Muda Malaysia (whether the group is legal or not is another story). Sida tiga ke ditangkap nya siko mai kek, dua iko megai banner ke betulis “Happy Birthday Altantuya”. Enggaika nadai cerita meh sida tu.

3. Krisis DUN Perak
Maya aum DUN kena 7-5-09, capuh baka Parliament Taiwan sida YB ADUN Perak. Speaker Dewan sampai 6-7 jam enda angkat ari kerusi, ke jamban pan nadai meh enggaika penuduk diambi urang, pengujung iya di irit Polis keluar tudah tuai.

Udah nya kes pechara ba Mahkamah, ngiga sapa ke betul tau jadi MB Perak. Terubah iya YB Nizar menang, gaga meh tudah tuai, begegas pulai ngagi Ipoh. The guy was so excited that he even update his blog . Dr Zambry pan enggai alah, iya alu nusoi sebana diri dalam blog iya empu, nyembaka ke diri enggau Gandhi seduai Mandela.

Pagi siti Dr Zambry niki upis Mahkamah, lalu dikemendar ke sida ngapil, naka ke diatu tau ngereja pengawa jadi MB.

Enda alah tusoi jerita Politik Perak, bebelit agi ari wayang Hindustan, asaika ka ngiga gitar aku alu mai lagu “….. it’s a long and Winding Road ….”

4. Tun Abdullah
Terubah iya Tun dilantik nyadi Advisor kumpeni bilun Malaysia Airlines (MAS), udahnya ditambah ke siti agi pengawa nyadi Advisor ke National Corridor Development. Manah mehnya, bisi ga nambah ke pencen tudah tuai. Tang enti disbanding enggau Tun Mahathir ke diberi nyadi Advisor ke Petronas enggau Proton, tajapan Tun M glamour agi bisi upis ba Petronas Twin Tower, tang Tun Abdullah untung agi laban ulih nepan bilun free kia kitu, bini pan agi regas, nyamai dibai raun kia kitu.

5. Rega Minyak
Anang enda ngadang ngadang kitai, peda aku rega minyak diatu niki seniki, diatu udah semak USD60, suba maya aku ngelekat ke widget nya ba blog tu kurang ari USD40.

6. Leka Jaku Dayak
Enti enda tau agi dikena leka jaku “Dayak” munyi ke sebut siko ari Menteri bansa kitai, bulan enam tu ila kitai nyambut “Gawai Iban” tauka “Gawai Bidayuh” laban nadai agi Gawai Dayak, nyamai agi kitai ngintu Gawai Lelabi, udah badu Gawai kitai bulih lelabi.

Nya aja, mupok aku.

Mentuka Belantak di Jalai Matang, Petra Jaya

Empat buah kereta belantak ala “accordion” ba Jalai Matang semak Supermarket Century. Kami tepeda ke tu jam 11.00 pagi leboh ke mansang ngagai Sunday market ngiga sayur. Iya ke balat endar rusak muto ditengah- Proton Iswara Aeroback, ba luan ngelatak Proton Persona, kemudi iya kena lantak Wira.

Tambah ke mensia nang mayuh endar saritu agi begau ka meda Pasaraya baru, eMart. Sida ke belantak tu ukai ke ngagai eMart tang nuju simpang ke bisi traffic light ngagai Taman Matang Jaya. Selalu utai bansa tu ketegal sida ba mua nya nekan emergency brake, alu betampung tampung meh sida belantak ke burit motor pangan diri.Asal bisi eksiden bala tukang tarit motor jampat datai
Baka biasa meh, udah utai tu nyadi bala driba pansut begambar ke motor, bekelala enggau pangan diri, udahnya sama sama bejako ngena handphone nganggau kaban belayan. Ambulan kereta tarit pan datai, enda ibuh dipadah nadai dikangau tiba tiba bisi muncul, urang tu selalu standby 24 jam.

Ukai kitai minta pekara bansa tu selalu nyadi, tang kebuah deka nusoi cerita tu awak ke kitai semua (termasuk kami sebilik) selalu besabar ba jalai alun. Sembiang mimit dulu kini sebedau nyetat motor.

Latest Shopping Attraction in Kuching !!

Supermarket eMart Lee Ling ba Matangjaya, Petrajaya udah berengkah bejual barang ari kemari. Tu ke ngasuh balat endar traffic jam kami di Matang saritu, laban mensia semua berebut ka meda utai ke dijual ba kedai ke baru dibuka nya.

Matangjaya diatu makin maju, kedai makin mayuh lalu DBKU pan makin senyum, laban taun baru ila menua kami ditu nyangka kena pegai Bandaraya Kuching Utara, nadai agi di intu sida Majlis Perbandaran Padawan (MPP).
Mensia mayuh ngabas Supermarket baru - eMart Lee Ling
Kami menyanak apin enggau urang ngabas kedai baru tu, kelalu mayuh mensia parking nadai endur, bisi maya sida enggai agi kia ila baru kami mansang nemuai meda utai dia. Pia agi barang dirumah ditu baka garam, kupi, beras enggau gula agi mayuh, ba penemu aku enda ibih enggau urang begelut dia. Tambah agi asai ke nadai kaban belayan tauka urang bukai ke dikelala bejual dia. Tang kita bukai enti deka meda ngabas Supermarket tu tau meh datai, nyangka bisi cheap sale.

External Harddisk 320 Giga bytes

Pengawa bemain download tu gian endar, suba udah meli external harddisk 120 G, maya nya suba rega iya RM380. Lebih setaun udah penuh di isi enggau semua utai enda entu pasal. Movie lebih 200 iti, lagu MP3 semak 5,000. Ni agi utai bukai baka file kerja, data, records, powerpoint presentations.

Enda ulih tat ke agi meli baru, Cina kedai pan selalu ngasuh meli. Terubah aku minta harddisk one terra byte. Apin bisi ko sida, iya ke bisi bansa internal harddisk dikena desktop. Aku pan nemu meh utai nya laban udah meda iya ba Spring suba.
Iya ke biru nya harddisk lama 120G, iya ke baru nya 320G, internal harddisk 80G, semua 520G, nya baru puas ati setengah terra Gig semua
Pengujung iya meli ke bansa 320 gig, bansa biasa, dua taun gerenti. Rega iya RM300, murah agi ari ke iya lama. Ulih muat kira kira lebih 50,000 lagu tauka 500 movie, enti semina lagu aja disimpan aku retinya siti lagu rega iya 0.6 sen, enti semina wayang tukis aja disimpan aku dia retinya setiap movie rega iya 60 sen aja, murah agi ari VCD cetak rompak. Of course lah movie tu semua download, kira sama berompak meh nya. Tang nadai hal ba aku laban sida Hollywood udah kaya.

Tang ukai semina lagu enggau movie aja disimpan aku dia, harddisk tu udah di partition, bisi disedia aku bilik siti alai file kerja. Enda iboh bebincing ke notebook kia kitu.

Snippet/Sound Bites 20090506

Ngenang sekeda pekara ti nyadi tauka selalu disebut kemaya ari tu.

1. Selsema Babi

Diatu disebut kitai ngena nama baru H1N1.

Manah endar penemu tu laban penyakit tu ukai bejangkit ari kitai makai babi. Suba rauh rauh ba TV besebut pasal selsema babi, selsema khinzir ke ngujong kitai ke makai babi enda nyamai asai. Gawai pan nyau semak, nyadi kitai anang rawan ati pasal lauk asal kitai tu, ko jako Lutor penyakit H1N1 tu bejangkit ari ‘human to human ‘, kuman bejangkit ari orang bersin, batuk, beludah kin kitu etc.

2. One Malaysia

Konsep tu manah laban tuju iya nyerakup ke semua kitai ba menua tu, tang ukai semua dalam tu udah terang ba kitai. Bakani ko pasal bansa enggau agama.

Tauka utai tu semina slogan baru, awakka bisi bida enggau iya ke lama. Baka selama asal bisi penemu baru mesti bisi lagu, diatu benong di giga.

3. Altantuya

Lalu enda nemu badu cerita pasal niang tu, saritu (6-5-09) tiga iko urang udah ditangkap polis nitihka rita ari Malaysiakini. Mapap ga pengawa sida tiga tu, meli birthday cake sigi lalu dibai ngagai Putrajaya ngiga Datuk Najib mai iya sama berami ngintu hari jadi Altantuya.

4. Krisis DUN Perak

Panjai endar cerita tu, teringat aku ke lagu Eric Clapton “I Shot The Sheriff” ke popular dalam taun tujuh puluhan. Leka lagu iya munyi tu “I Shot The Sheriff, but I didn’t shoot the Deputy ….. “.

Ketua Menteri Perak ari PR udah ulih dibuai (legality pending court decision) tang Speaker Dewan agi mengkang, lalu iya tu lah ke begantung ke urang kiba kanan, agi nyadi penanggul sida BN ngereja pengawa. Mentuka Camry pan agi ba iya, laban iya endang apin badu jadi Speaker DUN.

5. Isu Agama Anak enti siko ari apai indai masuk Islam

Kes tu sensitive, tang patut diperatika kitai. Bulan nyin kemari Kabinet udah meri pemutus jaku enti siko ari apai indai nembiak masuk agama Islam, anak sida agi mengkang megai pengarap asal.

Pekara tu balat endar enda dipesetujuka sida ari Parti Politik Bulan, mayuh sida bekenang ke diri ngenggai ke utai tu. So it is back to square one, apin entu tetap.

6. PPSMI – Ngajar Sains & Matematik dalam jako English

Menteri Pelajaran apin berani ngemutuska pekara tu, tu utai besai ko iya nyadi enda tau kelalu beguai meri keputusan.

Aku irau ke iya empu endang enda setuju ke utai tu, nya kebuah laun ngatur. Tauka laban takut ninga bantah ari sida ke balat endar ngenggai ke anak kitai belajat Sains & matematik ngena jako urang putih.

7. By Election Penanti

Ari sepiak PR udah sedia manuk sabung, bulu udah dikelala, manuk lama bisi kala udah disabung tang nadai kala menang. Enda nemu meh kitai sekali tu, nyangka mimpi iya manah agi kini. Kangau tu apin disambut, nyadi keenda nyabung iya ke diatu apin temu.

Nya aja, ila bekenang ke pekara bukai.

Fund Raising Dinner Chapel Bandar Baru Semariang

Lemai hari lima tadi kami menyanak bisi enggau urang fund raising dinner ba Crown Imperial Hall, Crown Square, Pending. Pengrami tu di atur Gerempung Women’s Fellowship Parish of St Paul Siol Kandis, tuju ke begelumu makai lemai nya kena ngumpul duit kena ngaga Chapel ba Bandar Baru Semariang.

Patron kami malamnya YB Puan Sharifah Hasidah Sayeed Aman Ghazali, ADUN N7 Semariang. YB tu datai kediri enda mai laki lalu bisi besemaya deka meri RM15,000 kena mantu/nambahka duit projek ngaga Chapel. Manah endar meh nya laban YB Laut bisi penyinu ke kitai bisi mantu meri duit, arapka iya udah pulai ila agi ingat ke semayanya. Nyadi lemainya pemakai kami semua halal, beer pan nadai dijual baka ke ngelamatu, tang bisi siko dua iko kaban smuggle seput dua ari rumah.

Notis semak mua pintu. Apa reti "fung" ?

YB Hasidah tekenyit kena gambar aku leboh iya mansa meja kami

Me & my Missus nganti maya makai
Mayuh bala paderi kitai Anglican bisi datai malamnya, Father Kendu Kelin maca Opening Prayers; Rev Father Jugah Adi ngena tiga bansa jaku (Iban, Laut enggau urang putih) maya welcoming speech; Father Mathew Ubun maca blessing of the food. Band dikena malamnya – Maya, band popular di Kuching. Pengawa bukai malamnya baka selama – sponsor lagu, suara emas etc.

Penyampau meja – 100 iti semua abis dijual. Rega tikit antara RM350 – RM450 siti meja, enti siti meja untung RM100 tau bulih RM10,000 ari rega meja. Suara emas ulih ngumpul RM796, sponsor lagu bukai pan bulih beratus, derma bukai baka nyual kacang, bunga etc. Estimate aku malamnya sida iya ulih ngumpul semak RM 28 – 29 ribu, tu nyengkaum danji YB ke deka meri RM15,000. (Pledge aja, hopefully the committee will be successful in their follow up).

Upgrade RAM notebook

Dua tiga minggu tu aku bisi masalah pasal notebook ke dikena aku dirumah, selalau BSOD tauka padam kediri empu, suah agi lebuh maya ngabau Blog kaban ke bisi music tauka heavy graphic. Ukai semina nya lebuh startup sampai 30- 40 minit baru idup PC aku. Enda nemu kebuah iya, nyangkanya kena virus, RAM rusak, bisi kena pansa utai kini ketegal masuk menua sebayan Cyber digagai.

Puas aku berunding lalu mutus ati deka nukar RAM, nanya ngagai kedai Cina nadai mayuh jaku sida, asal kitai meli barang betul aja cara ngubat ba sida. Diatu aku ngena 2 Gig RAM, suba half gig.

RAM lama buatan Korea, enda nemu guna enggau iya agi, simpan ambi ke pengingat kini.

Bisi insur mimit ga udah upgrade RAM, memory mayuh agi, program ulih mayuh agi dibuka sereta. Tang masalah padam kediri empu kadang kadang agi bisi. Nyangka iya enggai anggat kini, lelak dikena.

RAM ke dikena aku diatu bansa made in China, brand – Kingston siri KVR667D2S5/2G,
Rega iya RM110. Enti meli ba PC Fair murah agi, tang aku enggai begelut enggau mensi ke segau segau nadai meli utai dia. Check aku ba internet brand bansa tu bisi rega sekitar USD40, kira ok meh enti aku meli ngena rega RM110. Kedainya enda jauh ari Opis aku ba Palm Road, Satok.

Unggal Iban Kiih bisi SMS aku ngasuh follow up enggau Aki Tuai pasal masalah IT, amat ga nya. Pelaba aku notebook aku tu agi bisi masalah bukai, nyangka startup configuration kini, China ba kedai ngasuh aku re-format, aku enggai, that will be my last resort. Ka pan enda ngerayap ngagai Google ngiga penemu ngubat diri empu.

Drama Pengawa bepilih mit sitak Penanti, Pulau Pinang

Naka ke diatu apin temu bisi tauka nadai pengawa bepilih mit ba sitak Penanti dalam menua pegai Pulau Pinang. Tajapan ADUN sitak nya Mohd Fairus udah madahka diri deka badu nyadi YB.

PM kitai Datuk Seri Najib Tun Razak bisi bejako pasal perkara tu, munyi ke udah leju ke pengawa bepilih mit bansa tu. Manah agi belanjanya dikena ngemansang ke menua, ko iya.

Tu amat betul penemu munyi nya, enti kitai nemu diri deka alah, tau enda iboh enggau betanding, enda masau duit.

Tang Tun Mahathir enda besetuju ke penemunya, menang tauka alah nya cerita dudi ko iya. Malu enti neju sida PR menang di darat, lalu awakka enda ngasa ati bala penyukong BN ba menua dia.

Tu amat betul penemu munyi nya, laban BN nadai kala enda bediri enti leboh maya bisi pengawa bakatu.

Nambah ke drama cerita DUN Penanti, YB Mohd Fairus ke ngelamatu kena siasat MACC udah sah nadai makai suap dalam penyarut dagang kuari. Nyadi retinya nadai kebuah iya ngemadu ke diri nyadi wakil rakyat. SPR pan baka ke setuju enggau penemunya lalu nangguh aum sida ngagai ari satu minggu ila.

Ba penemu aku :

1. YB Mohd Fairus enda tau narit surat badu nyadi YB betegal ke lepas ari MACC, laban terubah iya suba iya madah diri deka badu ukai ketegal tuduhan rasuah, tang laban ko jako deka nampong pelajar ngambi PHD. Sekula meh nuan enda iboh enggau urang bepolitik agi.
2. BN mesti enggau betanding laban malu agi enti enda. Anang irau pasal besai belanja laban undang undang kitai bisi sekat pasal pemayuh belanja ke tau dikena maya bepilih. Salah ba undang undang enti kita bebubuh ke duit maya bepilih nya ila.
3. Tun Mahathir, nuan tau enda iboh enggau urang kimpin maya nya ila. Teju ke sida ke biak biak ngereja pengawanya. Umbas meh iya ke udah, diatu ngawakka sida bukai ngatur menua. Meri peluang ngagai kami meda penemu urang bukai.
   

Aktiviti Ujung Minggu

Pengawa tu nadai planning, bisi dagin, bisi arang, bisi urang ka ngereja, nyadi meh projek kilat program BBQ ujung minggu. Suba udah bisi dapur digaga kena betunu, diatu nadai agi ngena nya. Tu kira bisi sangkut paut enggau kitar semula, re-use of abandoned wheelbarrow.Mobile BBQ Set
Ari iya ke garing garing enda dikena, manah agi kena betunu. Siti penyamai ngena ‘mobile BBQ set’ tu kitai ulih ngasur iya kia kitu, nyamai rari ke ujan enti bisi labuh maya bepangang.
First Half - makanan halal

2nd half – Utai burak tengah nya enda tau tinggal

Mentuka/Motosikal belantak ba Jalai Matang

Maya nurun pagi tadi bisi tepeda ke eksident di jalai Matang, ba mua Pasar Matang Jaya. Pelaba ke aku Mentuka Proton Gen2 keluar ari pasar Matang meraka jalai lalu dituntung motosikal. Nadai ga meda urang bakal/bebadi tang pintu Gen2 nya bisi bekau rindas.

Utai tu lah ngasuh kami jam pagi tadi, udah ga Matang tu endang terbilang jam pagi pagi, nadai eksident pan jam meh jalai.

Mensia baru start begau meda urang belantak

Enda ulih ngambi gambar ke terang agi laban bisi urang ngehon ari belakang, nyangka sida beguai takut enda ampit deka meda lumor kereta, kena ngiga nasib ujung minggu.

Hari Good Friday

Taun tu nadai enggau urang Easter Vigil, tang sempat ga pagi tadi enggau urang sembiang Good Friday ba gereja St Paul, Siol Kandis. Maya aku datai sembiang baru udah berengkah, mensia mayuh endar bisi lebih ari 200 iko, mayuh agi ke enda dikelala.

Kami duduk diluar laban nadai agi endor dalam gerija,.salah diri empu meh laban ke laun datai. Hari saritu manah endar, enda panas semina ujan mimit aja.

Gerija St Paul, Siol Kandis
Tajapan saritu Public Holiday di Sarawak bisi ga sida call ari Malaya, enda disaut aku. Ukai semua sida din mereti pasal kitai, datai dirumah muka email, bisi ga ari sida iya nanya tu minta nya, enda tau enda saritu ga ngadu. Hari satu ila meh aku baru aku meri, enti iya amat berat pagila ga kini aku malas mel sida

House Prayer Group

Demalam bala House Prayer Group ari St Paul’s Church, Kampong Siol Kandis bisi datai lalu ngatur pengawa sembiang ba rumah kami. Sida iya bisi beraban 14 iko lalu di ulu ke Sub Deacon Alexander datai kira kira pukul 8.40pm.

Kami sebilik laban ka enda mayuh tubuh bisi ngasuh bala ipar enggau sida sebilik sama datai maya tu tadi.

Bala raban House Prayer Group ari St Paul, Siol Kandis
Nyadi atur sembiang kami demalam baka selama, kami ngena jaku Iban, nyanyi pantun lalu besebutka leka jako “Allah” lebuh maya ke patut, asaika bisi lebih ari lima kali. Munyi ko kenang Tan Sri Leo Moggie, endang berengkah ari mit suba udah bakanya.

Meri terima kasih ngagai Raban Prayer Group ari St Paul laban bisi datai lalu ngeringka semengat kami sebilik dalam pengarap kitai.

Menang di Batang tekait ba Bukit

Terubah iya meri tahniah ngagai YB baru, Malcolm Mussen ti udah menang besai maya bepilih kemari di Batang Ai. Tang the clear winner yesterday are the Batang Ai’s electorates, laban mayuh pemansang udah dijanji perintah sekumbang ke bekimpin dua tiga minggu tu tadi. Enda patut ga enda diberi laban semuanya endang utai perlu utai penting, lalu pia mega ukai semina siko dua aja ke bisi ninga sida nibar jaku nya.

Politik Bukit sepiak nyin enda ulih dititih kitai. Ari perati aku, sahari tu sida ngundi, pagila udah start baru kimpin, nyendia ke diri kena bepilih baru. Enti kitai 24 jam bepolitik sahari ari, ni maya ngereja utai bukai. Ambi sema pengawa melaki bini, udah nikah, lalu bekurung enda pansut pansut ari bilik, enda nyelaie nya peda urang.

Diatu pengawa bepilih mit udah tembu, let the victors rejoice in their success and the losers reflect back to their loss., and for the rest of us, let’s move on.

BN to win in Batang Ai ?

Enggai enda ngaga ramalan pasal pengawa bepilih mit Batang Ai, gamal iya baka ke ulih menang manok ari BN. Overall score is 1-2, Dua Bukit agi diempu PR, Nitih ke komen Sim Kwang Yang PKR deka alah laban kurang puku lalu enda telaban ke BN ti udah besaup bebendar kimpin ba LA.

Bloggers bukai pan se penemu mega, baka Audie Chua madah "only a miracle can save Jawah enggau siko agi ditu. Semua sida tu ukai pro-BN.

Sebedau tu aku enda ngeluar komen laban nadai enggau urang begau ke LA. Kitai pan nadai enggau urang kimpin, mina meda ari jauh.

Diatu urang udah badu ngundi, jadi komen tu ukai kimpin, tang ari observation aku kediri. Pemutus penuh deka ditemu kitai apin tengah malam tu.

Summertime is Here !!!

Or rather it’s British Summer Time (BST). Enda berasai diatu udah bulan empat, BST udah start seminggu, this mean that tumu agi jam kitai ulih meda main bol EPL. Berengkah ari bulan tu main bol EPL start pukul 10.00. enda agi pukul 11.00pm jam kitai. Kickoff iya agi sebaka pukul tiga lemai ba menua Ai Ngelan.

Perubahan tu endang di antik kami ke rindu meda main bol, laban diatu ulih tumu agi tindok, enda ga buntau pagi siti. Pukul 10.00 malam meda main bol is just nice, abis pukul 12.00.

Semina enda manah pasal pagi tadi puncau ngasuh MU alah enggai ngasi agi. Referee pan semacam hal, meda MU apin menang ditambah iya 5-6 minit extra, udah MU menang baru iya ingat ka nyepu wisel.

Nujum Theory RAHMAN

Sejarah dunya deka nyadi leboh Najib ngankat sumpah nyadi PM nganti Abdullah Badawi. Tu meh pengujung nama dalam theory RAHMAN ianya pasal tusun PM menua Malaysia. Kitai aja ba Dunya tu bisi nujum theory baka tu.

R – Rahman Al-Haj (1957 – 1970)

A – Abdul Razak (1970 – 1976)

H – Hussien Onn (1976 – 1981)

M – Mahathir Mohamed (1981 – 2003)

A – Abdulah Badawi (2003 – 2009)

N – Najib Tun Razak (2009 - )

Theory nujum RAHMAN tu terubah disebut bala politikus zaman Mahathir tahun lapan puluhan, maya Musa Hitam badu nyadi DPM, nyangka laban nama iya ukai spell ari “A”.

The question now is that what happen after the completion of this prophecy of RAHMAN. Bisi urang nyebut di tampung nyadi RAHMANTULLAH bisi ga nyebut RAHMANATHAN penatai nama asal Rahman dalam mitos Hindu.

Lim Kit Siang lain agi utai sebut, after “N” will be the end, ko iya. Retinya Parti bukai bekuasa udah nya.

Bisi theory lain ngeramal nama RAHMAN tu ila reverse. Undah Najib tu ila urang nama “A” jadi PM, lalu di ganti urang nama “M” (Muhiyiddin Yassin ?) lalu di tampung urang ngena nama “H” (Hishamuddin). But first sapa urang nama “A” tu lalu ni maya iatu timbul.

Leju berandau kediri

I think now is the time I come out from my shell and meet the rest in the cyber World.

Rindu ga maca blog urang, bisi ke dikelala, bisi sekeda nadai kala enggau betemu.


Bulan nyin kemari sebedau pengawa urang nganjung nama di LA, aku bisi betemu enggau a few active Iban bloggers. Maya nya aku bisi meli bup "Broken Shield" enggau "Rentap" ari sida. Udah abis baca ila baru aku post "Book Review" ditu, enti bisi masa.