Aku terubah nemu pasal gempuru tu ari Ruai James Joshua Guang, tang iya empu nadai datai lemainya. Aku nadai besemaya tauka madah diri datai ngagai organizer, meda lemainya nadai programme bukai, udah badu ba upis lalu terus ngagai tempatnya. Selain ari deka meda pengawa urang kira aku dia lagi bisi betemu enggau blogger bukai.
Sebedau tama ngagai Penview aku makai dulu ba kedai sepiak hotel dia, enggai ke urang laun makai, peda aku ukai siko aku aja ngetu dia. Bisi ga siko dua bala udah start muka utai semetik ba endur nya. Sempat ga aku betemu lalu berandau enggau Apaienduq ba kedainya.
Taja ba gerah madah pengawa berengkah pukul 6.30pm tang kami kira pukul 7.30pm baru niki ke Hotel, disambut bala indu ke bisi ngena ngepan kitai Dayak, dilangar ngena tuak. Sebedaunya tadi bisi betemu lalu sempat begambar enggau Blogger Merekah Fajar (Kerbo) & missus enggau Apaienduq.
Datai ba function room dia meda udah mayuh bala datai, umbas iya pemesai bilik nya, sida ke indu duduk ba kerusi banquet, sida ke laki diasuh duduk ba tikai dibaruh. Ngenda ke diri kami duai Kerbo alu duduk semak sida ke indu. Ukai apa, baka kami duai tu tusah endar enggau urang duduk dibaruh, angkat lagi pedis.
Kira semak pukul lapan dia YB Datuk Seri William Mawan Ikom pan datai, disambut bala organizer lalu dibai sida duduk ba tikai. Udahnya penganan, kacang enggau utai pakai bukai alu disadung ngagai temuai. Ai Tuak pan bisi mega disibur bala committee ngagai semua pengabang.
Kira udah maya cukup jam, bala pengabang udah ga jenuh baru Laja Sanggin ngarika committee pengatur pengawa ngiling tikai berengkah bejaku ngelaluka YB enggau semua pengabang bukai. Tembunya baru idar YB Datuk Seri bejaku, kira iya ngarika semua pengabang ke bisi datai.
Leboh maya iya ke bejaku lemainya YB Datuk Seri bisi meri jaku lalau ngagai bala bloggers ‘sometimes you can get excited after knowing something and would like to prove that you’re right’. Nyangka reti jaku YB Menteri tu ngasuh bala bloggers bejimat lebuh maya nusoi utai meh nya kini, enda ingat nanya iya lemai nya.
Udah badu Menteri bejaku kami lalu diperindangka enggau ajat ari sida Waifm ngarika main asal bansa Iban, Bidayuh enggau Orang Ulu. Udah tembu pengawa ngajat baru bala pengabang dibai makai.
Badu makai bala alu diperindang enggau lagu karaoke dibai sekeda penyanyi ke bisi datai, bala DJ ari WaiFM pan sama bisi mantai ke sera nyawa malamnya, kiraka segment merrymaking & happy hours meh maya nya. Sempat ga begambar enggau bala bloggers & pangan bukai ke bisi datai malamnya.
Pengawa ke pengabis malamnya – ngiling tikai, di atur semak tengah malam ba atas stage diulu ka YB Datuk Menteri. Sekeda bala dibaruh baka rauh ngasuh ngancau tikai ke digiling Menteri, nyangka agi belala Gawai kini, tauka udah mayuh kena keramak ai rimau.
Rindu endar malamnya, utai dipakai enggau dirup, ukai semina free tang cukup endar, arapka agi ulih diatur baru taun ila. Meri terima kasih ngagai WaiFM & Radiokitai.com ke ulih ngatur pengawa ngiling tikai 2009.
.jpg)
No comments:
Post a Comment