Friday 29 May 2009

Selamat Hari Gawai Dayak 2009 !!!

Saa… dua .. tiga .. empat .. lima .. enam .. tu … juh !!!
Ni kita petara aki petara ini ... kitu magang
Aku tu ngangau kita datai
Laban kami deka ngintu Gawai Dayak
Nitih ka pekat nitih ka adat kitai Sarawak

Aku ukai ngangau ngapa, ukai ngangau pia,
Aku mai kita ngabang, mai kita mansang,
Mai kita makai, mai kita nandai.
Aku mai piring, mai ading,
Piring penganan, piring penyaran,
Piring Arak, Piring Tuak,
Udah sedia, udah nyengenda,
Ditikai wi, tikai peradani,
Ditikai rutan, tikai bemban.

Oooo .. Ha .....

Kita ke ngabang bakanya mega,
Anang tuboh puang, tuboh sabatang,
Anang mai tuboh murus, tuboh untus,
Kita ke ngabang bakanya mega,
Anang tuboh puang, tuboh sabatang,
Anang mai tuboh murus, tuboh untus,
Tang mai ubat serangkap genap,
Dikena ngubat sida Tuai ke agi Lap
Sida ke enggai ke nama Dayak
Enda rindu ke bansa kitai dulu kelia
Awakka sida gerai baka kitai
Tau bai besulu nyamai enggau begulai

Aku besampi minta iching, minta perening.
Awak ka kami mudah bulih duit, bulih ringgit,
Bulih padi, bulih puli, bulih reta, bulih tengkira,
Awak ka sida anak, sida ke biak pandai sekula
Bulih degree, bulih PHD
Bisi diploma, nyamai ngiga kerja
Kami ke gawa niki pangkat bulih pingat
Manah prestasi, niki gaji, saham niki, minyak turun !

Nya alai dinga ka kangau anak mensia, kangau anak uda,
Minta tulong, minta sukong kita.

Oh... Ha ...


(Disclaimer - Biau tu di ambi / modified ari urang bukai, sampi asal bisi nyebut bulih setawak bulih seganak, aku ukai enda beguna ke setawak tang ka agi minta bulih microwave oven, flatscreen tv, notebook, iPhone etc enda nemu ngerintai iya ba leka biau tu..hehe heh)

Thursday 28 May 2009

From Serikin to eMart

24 May. Tengahari minggu tadi kami menyanak bisi bejalai ngagai eMart di Matang, our first visit. Sambil deka ensepi asai penyelap air con dia. Urang enda entu mayuh, aku pan bisi ngisi borang nyadi member eMart awakka bulih discount enti meli barang sida.

Pansut ari kedai lalu besatup enggau tarikan tauka umpan sida eMart … kereta Viva. Tu prais lucky draw, sapa ke meli barang eMart lebih ari RM80.00 dalam siti resit tau enggau cabut undi. Aku nadai mimpi malam tadi tang laban rega utai beli lebih seratus ringgit lalu ditepu aku dalam kereta ga resit kami. Ba resit ke udah di chop ba counter bisi ditulis nama, lumor IC, no h/phone.

Taju Remaung, prais lumor satu kena ngumpan kitai bebelanja ba eMart


eMart tu ba penemu aku bisi ga pemanah iya, rega barang bisi murah mimit tang sida mesti improve Customer Service dia. Dalam Kuching tu peda aku nadai ngelaban Customer Service ba Everise Batu 4, sampai ngagai kereta sida ngiring kitai nganjung barang. Supermarket bukai semina merening kitai aja sida iya, baka ka enggai ibuh ke pelanggan.

Pagi tadi bejegau ngagai Serikin kami menyanak, penundi kami kia dalam taun 2006. Mayuh perubahan peda aku, kedai mayuh agi, endor parking bisi disediaka ba pun jalai. Tang kami parking jauh kedalam, laban udah teleba nyimpan kereta dia, bayar semina RM2.00. Utai di jual baka ke suba, nadai mayuh ubah, nyual kain, barang main, batik, buah, keropok.

Marvin udah bulih ayam, enda tau enda meli


Sekeda utai ditu datai ari Kuching, di beli urang Kuching baru


Ba menua ditu, mutosikal tau enda ibuh belisin


Enda datai tiga jam kami lalu pulai, bisi ga meli utai mimit, ari balat endar panas ba menua dia. Datai di rumah, baru nemu game ke dibeli anak tadi enggai nyadi, rusak. Sangka aku ketawa Indon ke nyual iya tadi. Silap kami nadai testing, laban anak aku tadi udah dijengkau iya lalu enda dilengka. Aku kiruh betawar ke rega, meda iya ka diturunka rega alu enda ingat ngetest.

Saturday 23 May 2009

Daytrip ngagai KL

21 May, Travelling pulai-ari ngagai Nanga Lutak (KL), mansang ngena bilun Air Asia pukul 9.00 pagi, pulai ngena bilun MAS pukul 10.00 malam. Batang pejalai deka enggau urang mending ke penerang pasal financial performance kumpeni suku taun pertama. Ari LCCT ngena bas, ari jauh indu nyual tikit udah senyum ngumbuk kitai meli. Datai ba KL Central baru ngena teksi ngagai upis kami ba Menara TM, enchadi ke enda bejalai kaki niki bukit enti aku ngena LRT.

Menara TM, endur ke dituju nya ba tingkat 50


Leboh ke nepan teksi sempat ga meda penusah ba jalai alun, indu tambi ngena mutosikal kena lantak mentuka. Driba teksi ngetu nulung indu nya sekejab, leboh kami mupok agi duie duie tudah tuai nyabak tisi jalai, peda aku bisi bakal ba kaki.Bisi urang bukai nganjung iya ke Spital udahnya.

Mutosikal garing garing kena lantak ba Jalan Bangsar, KL


Sebedau begelumu ba Dewan Besai sempat aku ngabas pangan bukai gawa ba unit HQ. Sempat berandau enggau begambar enggau sida. Aku merati ke Culture sida ditu jarang makai tengahari, ukai pasal diet tang sangka aku udah makai jam pukul sepuluh.

Begambar enggau colleagues ari Penang, Malacca & KL


Bisi ujan mimit, gambar madangka Wisma Cygal, bisi upis TM dia


Gambar ari tingkat 50, madangka padang hoki Tenaga Berhad


Udah tembu mending ke jaku/pesan ari Tuai Telekom enggau pengawa bukai ba upis, aku al uterus nepan LRT ari stesen Kerinchi nitih pangan aku ngagai stesen Pasar Seni. Udahnya iya pulai ngena bas ke Seremban, pukul sembilan malam baru datai dirumah ko iya, pagi nurun kerja pukul enam. Merinsa endar gawa ba KL enti bakatu, nasib aku ulih besilat nulak tawaran gawa dia maya baru bebini suba.

Segau segau ba Petaling Street, apin entu mayuh urang maya nya


Stesen LRT Pasar Seni, jam pukul 7.13 lemai, ari agi terang ba KL


Model ERL, eni enda maya Sarawak bisi keretapi bakatu


Aku alu sesegau bejalai ngagai Petaling Street, nadai ga meli utai dia, enggai kiruh bebincing ke utai ba bilun, udah ngirup ai mata kucing aku mulai ke diri ngagai KLIA ngena LRT ari stesen Pasar Seni ngagai KL Central, ari nya ngena ERL. Aku endang jarang ngena teksi ba KL, baka lemai ari balat endar jam.

Bisi endar bida KLIA enggau LCCT ari pemayuh mensia, ba LCCT pagi tadi mayuh endar urang, KLIA ta puang peda aku. Ba smoking lounge pan mina bisi siko dua iko aja urang nginsap.

Nadai urang bukai, kediri aku aja ba smoking lounge, gambar tu di snap cleaner Bangla


Nyamai endar nepan bilun MAS maya pulai laban enda penuh, kurang ari setengah bala pasinjir, stewardess pan gaga meh laban nadai mayuh urang di intu. Bilun terengkah ba Kuching pukul 11.58 malam, datai di Rumah semak pukul satu. Lelak endang amat lelak tang siti penyamai traveling pulai ari tu kitai enda ibuh packing ke gari.

Tuesday 19 May 2009

Killer near the House

Terkenyit endar meda utai tu semak rumah kami, sapa meh bujang tu betukar garik, ngena baju baru tang ngepan lama ditingalka iya ba menua kitai. Ular tu enda tau dimain kitai, very venomous, enti sawa berani aku ngelaban, kala munoh jelunya kelia, tang enti Tedung tu ka berunding dulu meh kitai.

Ari gaya gamal tu, sah kulit ular Cobra


Bulan nyin kemari mayau kami bisi beranak, enda datai sebulan nadai agi meda, lenyau. Kumbai kami tesat sebelah housing ditu, tapi diatu kami sebilik suspek endang si Bujang Tedung al-Senduk tu meh empu hal.

Cute kitties, sayau amai anak mayau udah ditelan Cobra


Sinu amai meda indai mayau ngiga anak iya, kiaw kiaw tudah iya merening kami baka ka nanya. Mayau tu iya ke bendar ukai mayau kami, enda nemu sapa empu - stray cat, tang laban meda enggai pulai ari rumah kami diberi anak aku makai, nyau dibelika whiskas enggau utai bukai. Udahnya beranak dalam store kami dibelakang rumah, apin sempat meri nama alai udah ditelan ular.

Nadai cara bukai meh tu, besedia ke kayu, enti bisi meda gagai, sipat, palu.

Sunday 17 May 2009

Nebas Pendam SDNU Siol Kandis

Sun, 17 May- Pagi tadi bisi enggau urang nebas pendam Kampung Siol Kandis, pengawa tu di ator Komiti Pendam, SDNU pampang Siol Kandis. Sida begerah ba RTM mesan ngagai sapa ti bisi ngena pendam nya datai meresi kubur apai indai/kaban belayan diri empu, seninjik ga bisi ninga pesan, manah agi pendam tumu dibersi awakka semina nganjung bunga/nungkun dian semak hari Gawai ila.

Maya ka nebas ba pendam tadi aku bisi betemu enggau Thomas Tegong Laka, veteran announcer RTM bagian Iban. Lama kami duai berandau, iya tu suba bekas jiran aku ba Siol Kandis.

Begambar enggau Thomas Tegong Laka ba Pendam SDNU Siol Kandis


Bala kaban SDNU nebas kawasan pendam ngena bushcutter


Pendam SDNU Kampong Siol Kandis tu terubah iya dikena dalam taun tujuh puluhan. Majoriti ke ngena pendam tu urang Kristian Anglican tang urang Kristian bukai ari Gerija Katholik, SIB enggau Pagan pan bisi mega tau ngena Pendam tu selagi sida urang asal ba Kampung Siol Kandis.

Al-kisah Buah Jambu

Diatu pun jambu kami ke ba tisi rumah benong bebuah, penundi iya bebuah maya Hari Christmas taun nyin kemari. Jambu bansa tu enda bemusing tang pun ke ditanam entua aku ditu baka ke bebuah dua kali setaun. Sekali tu lebat agi buah iya peda aku, enti di itung anggar aku bisi dalam 300 igi, sekeda dan iya agi bebunga.
Jambu Ai, baru mansau


Pun Jambu, tanah enda besai semina nanam sepun aja

Pemesai buah iya kira kira 5 – 6 cm, asai iya sedang pemanis, nyamai endar enti di empa ngena garam, tauka sambal belacan.

Aku ngambar pun enggau buah jambu tu berengkah ari bulan tiga, terubah iya maya iya baru bebunga, ka meda penyampat iya besai, kira ngaga kajian meh keno jaku. Ari perati aku, buah jambu tu tau diambi selepas 7-8 minggu udah iya bebunga. Aku ngambar iya tiap ari enam tauka ari minggu.

28 March 2009, baru bebunga


11 April 2009, bunga mechah keluar


11 April 2009, burak tanah laban bunga gugur


18 April 2009, lepas bebunga, jai gamal iya


26 April 2009, udah bisi buah mit mesai tunjuk


2 May 2009, buah udah besai mimit, geram ati ka ngetil


9 May 2009, apin cukup besai, agi kelat enti dempa


17 May 2009, At last udah tau dikarang


17 May 2009, nasib endar ga pun enda tinggi, nyamai di jengkau ari tanah


Pun jambu tu udah ditanam kira kira 3-4 taun, peninggi iya kira kira 12 kaki, enggi kami tu nadai entu dibaja, tang ok ga gamal pun iya. Ambika pakai diri empu cukup, bisi ga diberi dibagi mimit ngagai kaban ke mansa datai kerumah.

Thursday 14 May 2009

Anugerah Pekerja Cemerlang 2009 - Jatan Kidu

Aku deka meri tahniah enggau pengaga ati ngagai Jatan anak Kidu ke udah bulih gelar Anugerah Pekerja Cemerlang 2009 (Category OKU). Gaga enggau rindu ati laban iyatu pangan aku, sama enggau kerja ba Telekom (TM) lalu kelebih agi pemenang Anugerah Pekerja Cemerlang taun tu bansa kitai Dayak. Menua asal ari Serudit, Paku, Spaoh.

Jatan nerima Anugerah tu kena 2-5-2009, bisi pansut ba TV1 sarinya maya tengahari ngayanka Jatan nerima Piala ari Prime Minister kitai, DS Najib ba Bukit Jalil, KL.
Jatan nerima trophy Anugerah Pekerja Cemerlang ari Najib


Jatan begambar enggau pemenang bukai


Kami dua En Jatan sama sereta ngelapur diri kerja ba Jabatan Telekom taun 1983, sama enggau urang kursus masang kabel dalam/baruh tanah, tang penemunya nadai kala dikena kami duai. Dalam kadang 26 taun kerja ba Telekom kami dua mayuh betukar unit, kadang kadang begulai, diatu enda sama Unit. Taja nadai agi begulai upis, aku nemu Jatan endang patut nerima Anugerah Pekerja Cemerlang, walaupun iya tu betaraf OKU, iya diberi kerja sebaka enggau urang bukai. Suah agi produktif ari sida ke bukai.

Sama sama sigat, Jatan (left) and myself. Aku biak setaun tang besai mimit aja ari iya


Nitih ke rita ari iya empu, sarinya iya nerima ari DS Najib piala siti, certificate enggau pala agung .. RM RM meh nya. Bisi dikena ujung bulan tu enggau pun bulan enam ila.

Wednesday 13 May 2009

Snippets/Soundbites 20090513

Nampung kenang pekara ti nyadi tauka selalu disebut kemaya ari tu.

1. Selsema Babi
Rega manuk diatu niki, makin mar ketegal mensia jarang tauka ngelaung ke dagin janik Tang ba kedai kopi mi kolok enggau kway chap agi laku.

2. Altantuya
Nadai agi ninga rita sida tiga iko tambab ke mai kek birthday ngagai Putrajaya. Semua sida iya 30 iko ari raban ke ngelar diri Solidariti Anak Muda Malaysia (whether the group is legal or not is another story). Sida tiga ke ditangkap nya siko mai kek, dua iko megai banner ke betulis “Happy Birthday Altantuya”. Enggaika nadai cerita meh sida tu.

3. Krisis DUN Perak
Maya aum DUN kena 7-5-09, capuh baka Parliament Taiwan sida YB ADUN Perak. Speaker Dewan sampai 6-7 jam enda angkat ari kerusi, ke jamban pan nadai meh enggaika penuduk diambi urang, pengujung iya di irit Polis keluar tudah tuai.

Udah nya kes pechara ba Mahkamah, ngiga sapa ke betul tau jadi MB Perak. Terubah iya YB Nizar menang, gaga meh tudah tuai, begegas pulai ngagi Ipoh. The guy was so excited that he even update his blog . Dr Zambry pan enggai alah, iya alu nusoi sebana diri dalam blog iya empu, nyembaka ke diri enggau Gandhi seduai Mandela.

Pagi siti Dr Zambry niki upis Mahkamah, lalu dikemendar ke sida ngapil, naka ke diatu tau ngereja pengawa jadi MB.

Enda alah tusoi jerita Politik Perak, bebelit agi ari wayang Hindustan, asaika ka ngiga gitar aku alu mai lagu “….. it’s a long and Winding Road ….”

4. Tun Abdullah

Terubah iya Tun dilantik nyadi Advisor kumpeni bilun Malaysia Airlines (MAS), udahnya ditambah ke siti agi pengawa nyadi Advisor ke National Corridor Development. Manah mehnya, bisi ga nambah ke pencen tudah tuai. Tang enti disbanding enggau Tun Mahathir ke diberi nyadi Advisor ke Petronas enggau Proton, tajapan Tun M glamour agi bisi upis ba Petronas Twin Tower, tang Tun Abdullah untung agi laban ulih nepan bilun free kia kitu, bini pan agi regas, nyamai dibai raun kia kitu.

5. Rega Minyak
Anang enda ngadang ngadang kitai, peda aku rega minyak diatu niki seniki, diatu udah semak USD60, suba maya aku ngelekat ke widget nya ba blog tu kurang ari USD40.

6. Leka Jaku Dayak
Enti enda tau agi dikena leka jaku “Dayak” munyi ke sebut siko ari Menteri bansa kitai, bulan enam tu ila kitai nyambut “Gawai Iban” tauka “Gawai Bidayuh” laban nadai agi Gawai Dayak, nyamai agi kitai ngintu Gawai Lelabi, udah badu Gawai kitai bulih lelabi.

Nya aja, mupok aku.

Sunday 10 May 2009

Mentuka Belantak di Jalai Matang, Petra Jaya

Empat buah kereta belantak ala “accordion” ba Jalai Matang semak Supermarket Century. Kami tepeda ke tu jam 11.00 pagi leboh ke mansang ngagai Sunday market ngiga sayur. Iya ke balat endar rusak muto ditengah- Proton Iswara Aeroback, ba luan ngelatak Proton Persona, kemudi iya kena lantak Wira.

Tambah ke mensia nang mayuh endar saritu agi begau ka meda Pasaraya baru, eMart. Sida ke belantak tu ukai ke ngagai eMart tang nuju simpang ke bisi traffic light ngagai Taman Matang Jaya. Selalu utai bansa tu ketegal sida ba mua nya nekan emergency brake, alu betampung tampung meh sida belantak ke burit motor pangan diri.
Asal bisi eksiden bala tukang tarit motor jampat datai

Baka biasa meh, udah utai tu nyadi bala driba pansut begambar ke motor, bekelala enggau pangan diri, udahnya sama sama bejako ngena handphone nganggau kaban belayan. Ambulan kereta tarit pan datai, enda ibuh dipadah nadai dikangau tiba tiba bisi muncul, urang tu selalu standby 24 jam.

Ukai kitai minta pekara bansa tu selalu nyadi, tang kebuah deka nusoi cerita tu awak ke kitai semua (termasuk kami sebilik) selalu besabar ba jalai alun. Sembiang mimit dulu kini sebedau nyetat motor.

Saturday 9 May 2009

Latest Shopping Attraction in Kuching !!

Supermarket eMart Lee Ling ba Matangjaya, Petrajaya udah berengkah bejual barang ari kemari. Tu ke ngasuh balat endar traffic jam kami di Matang saritu, laban mensia semua berebut ka meda utai ke dijual ba kedai ke baru dibuka nya.

Matangjaya diatu makin maju, kedai makin mayuh lalu DBKU pan makin senyum, laban taun baru ila menua kami ditu nyangka kena pegai Bandaraya Kuching Utara, nadai agi di intu sida Majlis Perbandaran Padawan (MPP).
Mensia mayuh ngabas Supermarket baru - eMart Lee Ling

Kami menyanak apin enggau urang ngabas kedai baru tu, kelalu mayuh mensia parking nadai endur, bisi maya sida enggai agi kia ila baru kami mansang nemuai meda utai dia. Pia agi barang dirumah ditu baka garam, kupi, beras enggau gula agi mayuh, ba penemu aku enda ibih enggau urang begelut dia. Tambah agi asai ke nadai kaban belayan tauka urang bukai ke dikelala bejual dia. Tang kita bukai enti deka meda ngabas Supermarket tu tau meh datai, nyangka bisi cheap sale.

Friday 8 May 2009

External Harddisk 320 Giga bytes

Pengawa bemain download tu gian endar, suba udah meli external harddisk 120 G, maya nya suba rega iya RM380. Lebih setaun udah penuh di isi enggau semua utai enda entu pasal. Movie lebih 200 iti, lagu MP3 semak 5,000. Ni agi utai bukai baka file kerja, data, records, powerpoint presentations.

Enda ulih tat ke agi meli baru, Cina kedai pan selalu ngasuh meli. Terubah aku minta harddisk one terra byte. Apin bisi ko sida, iya ke bisi bansa internal harddisk dikena desktop. Aku pan nemu meh utai nya laban udah meda iya ba Spring suba.
Iya ke biru nya harddisk lama 120G, iya ke baru nya 320G, internal harddisk 80G, semua 520G, nya baru puas ati setengah terra Gig semua

Pengujung iya meli ke bansa 320 gig, bansa biasa, dua taun gerenti. Rega iya RM300, murah agi ari ke iya lama. Ulih muat kira kira lebih 50,000 lagu tauka 500 movie, enti semina lagu aja disimpan aku retinya siti lagu rega iya 0.6 sen, enti semina wayang tukis aja disimpan aku dia retinya setiap movie rega iya 60 sen aja, murah agi ari VCD cetak rompak. Of course lah movie tu semua download, kira sama berompak meh nya. Tang nadai hal ba aku laban sida Hollywood udah kaya.

Tang ukai semina lagu enggau movie aja disimpan aku dia, harddisk tu udah di partition, bisi disedia aku bilik siti alai file kerja. Enda iboh bebincing ke notebook kia kitu.


Thursday 7 May 2009

Snippet/Sound Bites 20090506

Ngenang sekeda pekara ti nyadi tauka selalu disebut kemaya ari tu.

1. Selsema Babi

Diatu disebut kitai ngena nama baru H1N1.

Manah endar penemu tu laban penyakit tu ukai bejangkit ari kitai makai babi. Suba rauh rauh ba TV besebut pasal selsema babi, selsema khinzir ke ngujong kitai ke makai babi enda nyamai asai. Gawai pan nyau semak, nyadi kitai anang rawan ati pasal lauk asal kitai tu, ko jako Lutor penyakit H1N1 tu bejangkit ari ‘human to human ‘, kuman bejangkit ari orang bersin, batuk, beludah kin kitu etc.

2. One Malaysia

Konsep tu manah laban tuju iya nyerakup ke semua kitai ba menua tu, tang ukai semua dalam tu udah terang ba kitai. Bakani ko pasal bansa enggau agama.

Tauka utai tu semina slogan baru, awakka bisi bida enggau iya ke lama. Baka selama asal bisi penemu baru mesti bisi lagu, diatu benong di giga.

3. Altantuya

Lalu enda nemu badu cerita pasal niang tu, saritu (6-5-09) tiga iko urang udah ditangkap polis nitihka rita ari Malaysiakini. Mapap ga pengawa sida tiga tu, meli birthday cake sigi lalu dibai ngagai Putrajaya ngiga Datuk Najib mai iya sama berami ngintu hari jadi Altantuya.

4. Krisis DUN Perak

Panjai endar cerita tu, teringat aku ke lagu Eric Clapton “I Shot The Sheriff” ke popular dalam taun tujuh puluhan. Leka lagu iya munyi tu “I Shot The Sheriff, but I didn’t shoot the Deputy ….. “.

Ketua Menteri Perak ari PR udah ulih dibuai (legality pending court decision) tang Speaker Dewan agi mengkang, lalu iya tu lah ke begantung ke urang kiba kanan, agi nyadi penanggul sida BN ngereja pengawa. Mentuka Camry pan agi ba iya, laban iya endang apin badu jadi Speaker DUN.

5. Isu Agama Anak enti siko ari apai indai masuk Islam

Kes tu sensitive, tang patut diperatika kitai. Bulan nyin kemari Kabinet udah meri pemutus jaku enti siko ari apai indai nembiak masuk agama Islam, anak sida agi mengkang megai pengarap asal.

Pekara tu balat endar enda dipesetujuka sida ari Parti Politik Bulan, mayuh sida bekenang ke diri ngenggai ke utai tu. So it is back to square one, apin entu tetap.

6. PPSMI – Ngajar Sains & Matematik dalam jako English

Menteri Pelajaran apin berani ngemutuska pekara tu, tu utai besai ko iya nyadi enda tau kelalu beguai meri keputusan.

Aku irau ke iya empu endang enda setuju ke utai tu, nya kebuah laun ngatur. Tauka laban takut ninga bantah ari sida ke balat endar ngenggai ke anak kitai belajat Sains & matematik ngena jako urang putih.

7. By Election Penanti

Ari sepiak PR udah sedia manuk sabung, bulu udah dikelala, manuk lama bisi kala udah disabung tang nadai kala menang. Enda nemu meh kitai sekali tu, nyangka mimpi iya manah agi kini. Kangau tu apin disambut, nyadi keenda nyabung iya ke diatu apin temu.

Nya aja, ila bekenang ke pekara bukai.

Saturday 2 May 2009

Fund Raising Dinner Chapel Bandar Baru Semariang

Lemai hari lima tadi kami menyanak bisi enggau urang fund raising dinner ba Crown Imperial Hall, Crown Square, Pending. Pengrami tu di atur Gerempung Women’s Fellowship Parish of St Paul Siol Kandis, tuju ke begelumu makai lemai nya kena ngumpul duit kena ngaga Chapel ba Bandar Baru Semariang.

Patron kami malamnya YB Puan Sharifah Hasidah Sayeed Aman Ghazali, ADUN N7 Semariang. YB tu datai kediri enda mai laki lalu bisi besemaya deka meri RM15,000 kena mantu/nambahka duit projek ngaga Chapel. Manah endar meh nya laban YB Laut bisi penyinu ke kitai bisi mantu meri duit, arapka iya udah pulai ila agi ingat ke semayanya. Nyadi lemainya pemakai kami semua halal, beer pan nadai dijual baka ke ngelamatu, tang bisi siko dua iko kaban smuggle seput dua ari rumah.

Notis semak mua pintu. Apa reti "fung" ?


YB Hasidah tekenyit kena gambar aku leboh iya mansa meja kami


Me & my Missus nganti maya makai

Mayuh bala paderi kitai Anglican bisi datai malamnya, Father Kendu Kelin maca Opening Prayers; Rev Father Jugah Adi ngena tiga bansa jaku (Iban, Laut enggau urang putih) maya welcoming speech; Father Mathew Ubun maca blessing of the food. Band dikena malamnya – Maya, band popular di Kuching. Pengawa bukai malamnya baka selama – sponsor lagu, suara emas etc.

Penyampau meja – 100 iti semua abis dijual. Rega tikit antara RM350 – RM450 siti meja, enti siti meja untung RM100 tau bulih RM10,000 ari rega meja. Suara emas ulih ngumpul RM796, sponsor lagu bukai pan bulih beratus, derma bukai baka nyual kacang, bunga etc. Estimate aku malamnya sida iya ulih ngumpul semak RM 28 – 29 ribu, tu nyengkaum danji YB ke deka meri RM15,000. (Pledge aja, hopefully the committee will be successful in their follow up).

Friday 1 May 2009

Upgrade RAM notebook

Dua tiga minggu tu aku bisi masalah pasal notebook ke dikena aku dirumah, selalau BSOD tauka padam kediri empu, suah agi lebuh maya ngabau Blog kaban ke bisi music tauka heavy graphic. Ukai semina nya lebuh startup sampai 30- 40 minit baru idup PC aku. Enda nemu kebuah iya, nyangkanya kena virus, RAM rusak, bisi kena pansa utai kini ketegal masuk menua sebayan Cyber digagai.

Puas aku berunding lalu mutus ati deka nukar RAM, nanya ngagai kedai Cina nadai mayuh jaku sida, asal kitai meli barang betul aja cara ngubat ba sida. Diatu aku ngena 2 Gig RAM, suba half gig.

RAM lama buatan Korea, enda nemu guna enggau iya agi, simpan ambi ke pengingat kini.


Bisi insur mimit ga udah upgrade RAM, memory mayuh agi, program ulih mayuh agi dibuka sereta. Tang masalah padam kediri empu kadang kadang agi bisi. Nyangka iya enggai anggat kini, lelak dikena.

RAM ke dikena aku diatu bansa made in China, brand – Kingston siri KVR667D2S5/2G,
Rega iya RM110. Enti meli ba PC Fair murah agi, tang aku enggai begelut enggau mensi ke segau segau nadai meli utai dia. Check aku ba internet brand bansa tu bisi rega sekitar USD40, kira ok meh enti aku meli ngena rega RM110. Kedainya enda jauh ari Opis aku ba Palm Road, Satok.

Unggal Iban Kiih bisi SMS aku ngasuh follow up enggau Aki Tuai pasal masalah IT, amat ga nya. Pelaba aku notebook aku tu agi bisi masalah bukai, nyangka startup configuration kini, China ba kedai ngasuh aku re-format, aku enggai, that will be my last resort. Ka pan enda ngerayap ngagai Google ngiga penemu ngubat diri empu.