Sunday 28 June 2009

Gawai Makai Selamat - Lundu

13th June 2009, Pengrami Gawai apin abis, sekali nusoi rita kami ke makai Selamat di Kampung Sebemban, Lundu. Maya nya mood Gawai endang agi tebal, bala aku udah dulu mupok kena lemai ari lima, aku empu laban ka bisi hal bukai nitih dudi kena lemai ari enam.

Checklist lemai ari - Canopy udah siap


Kerusi udah siap ditusun


PA system & Karaoke set udah siap


Crew DJ udah siap, agi benong practise


Crew di dapur pan udah ga sedia, smua OK


Urang ke empu pengawa tu nya bala kaban sepiak ari bini aku, sida sebilik dua tiga taun tu ke bisi kena penusah jalai alun. Taun 2006 entua aku ke indu kena lantak 4WD semak mua rumah, udahnya taun 2008 nyin suba Hilux sida sebilik di lantak urang ba simpang Tondong, sida iya ka ngagai kami di Matang.

Puji Tuhan, semua utai besangkut paut enggau penusah nya diatu nyauka semua beres, iya ke patah kaki udah gerai, muto rusak udahga di repair. Nyadi tu tadi kira pengawa makai selamat laban gaga ati semua penusah ngelamatu udah lepas, lalu minta berkat ngeringka semengat ka sida sibilik.

Paderi ka datai nulong kami ngemujur ke pengawa lemai nya, Father Andrew Stephen Rahah.

Paderi ngulu ke bala sembiang, gambar enda terang – cameraman ngelu pala


Makai – selepas blessing pemakai ari Paderi


Backstreet Boys - makai ba belakang rumah, malu meda urang rami


Udah makai … ngansar ka kaki


Pengawa berengkah kira pukul enam, udah badu sembiang, bisi bejako mimit baru makai. Udah tembu makai, baru pengawa berkaraoke berengkah, laban sida ke tuai agi malu tauka agi chelap bala sida anak mit meh mungkal menalan, nyau jauh malam maya mata enda entu terang, pending enda entu ninga baru utai makin rancak.

Selemai lemai nya kami berkaraoke, poco poco, bejoget sambil besadung. Udah tengah malam audio system pan “kong” baru badu, tang tubuh bisi endar asai, nembiak mayuh udah tinduk, temuai ke jauh udah mupuk pulai, iya ke semak agi ngetan laban agi bisi utai bukai kena ngerindang pengabang.

Ngidup ke api kena nunu Ikan gembung


Sekeda bala nunu ikan


Sekeda bala sambil nganti ikan mansau, besadung


Nat ke diri dulu


Pedis endar ngendani ke diri pagi ari, asai ke tindok sampai tengahari tang bisi pengawa bukai, utai ke dikena demalam mesti dikemas. Utai ke di injau mesti dianjung pulai enggaika urang bukai ka ngena. Utai enggi diri empu pan mesti disimpan awakka bisi dikena maya bukai.

Udahnya, laban ke agi ka, kami alu nampung pengawa besadung tengaharinya, bisi gab ala nembiak nunu ikan. Iya ga maya tengahari, iya ga panas terit, utai disadung tinggi endar takar, tat ke aja meh iya ga ka, ukai selalu.

Friday 19 June 2009

Gawai Melah Pinang – Lundu

6th June 2009 – Pengawa nikah di Kampung Tabuan, Lundu. Selamat Pengantin Baru ngagai Danny & Leha ke udah jadi melaki bini. Iya ke laki asal ari Lubok Antu/Sri Aman, iya ke indu (cousin of my wife) asal ari Lundu.

Seduai tu sama agi biak (twenty plus), sama sama graduate ari UiTM, iya ke laki gawa ba Medical Dept Bintulu lalu iya ke indu kerja ba Kumpeni di Lundu.

Pengawa udah mujur dikerja sarinya, ba sebelah pagi bisi diatur Church Wedding di Gerija Christ Church, Stunggang, Lundu, lalu sebelah lemai bisi pengerami makai malam beselamat ke seduai ke udah nyadi ba rumah pengantin indu di Kpg Tabuan, Lundu.

Paderi ke merkat ke pengawa seduai di Gerija enggau maya rami makai malam di rumah pengantin nya Father Jackson Jarau

Gerija Christ Church, Stunggang, Lundu


Ngaga pengingat – begambar enggau pengantin


Beratus iko - Penyampau pengabang ke bisi datai


Pangau ke alai urang bejaku, slideshow & Band Boys


Gambar maya betunang – 5th June 2008


Gambar malam nikah – 6th June 2009


Kami menyanak mulai ke diriempu ari Ng Pek, Debak kena ari empat (4th June 2009), rest sari aja di Kuching kena ari lima. Ari siti terus pecut mansang ke Lundu enggai ke enda ampit enggau urang ngabang Gawai Lelabi. Tu meh peluang nampung pengawa berami enggau diri sekaban.

Udah badu makai rami endar laban bisi Live band ari Kampung Siling merindang bala pengabang. Nyadi malamnya bisi slideshow, belagu, bisi bejoget joget, poco poco, ai irup free flow tang bala sama nemu nagang diri, nadai apanama malamnya.

Pengabang mayuh endar lemai nya, bisi lebih empat ratus iko. Ari sepiak lelaki pan mayuh mega datai, bisi catar bas sebuah dikena sida iya kelimpah ari bala bukai ke mai kereta diri empu. Ari sepiak indu enda iboh kiralah, endang menua diri empu.

Arapka seduai tu mujur begulai enggau pangan diri, munyi ko Melayu - moga kekal ke anak cucu.

Wednesday 17 June 2009

Gawai Mangkung Tiang – Ulu Babu, Rimbas

3rd June 2009, hari ketiga Gawai - enda nyadi pulai ke Kuching sarinya laban deka enggau urang ngabang ngagai Rumah Setang, di Ulu Babu, Rimbas. Rumahpanjai kami bisi kena ambi sida ngabang, nyadi paginya bisi tujuh iko kami serumah bisi datai ngabang nyengkaum Tuai Rumah Ng Pek enggau Sapit iya. Rumahpanjai bukai ke semak dia bisi mega kena kangau magang tang enda semua ulih datai, mensia bisi ke udah pulai ke nengri, sekedanya bisi pengawa bukai, tambahka agi sida di ili malamnya bisi rabat, taja pia mayuh ga urang datai.

Pengabang VIP ke bisi datai sarinya Menteri Sumber Asli dan Alam Sekitar merangkap MP Betong , YB Datuk Douglas Uggah, enggau ADUN Bukit Saban ,YB Robert Lawson Chuat. Sama bisi datai sarinya Residen Betong Romie Sigan Daniel, Setiausaha Politik Kementerian Sumber Asli & Alam Sekitar Dr Richard Rapu enggau sida Tuai Tuai Opis Perintah ari Bagian Betong. Sida pengabang tu enda datai mai jari puang sama bisi mai ubat serangkap genap, pengaruh gembar tubuh.

Laban sida serumah mayuh ke udah megai pengarap Kristian, nyadi pengawa sarinya bisi ngena cara sembiang. Paderi ke merkat pengawa paginya diambi ari Gerija St Augustine, Debak ianya Father Kebin Suur.

Sekeda pengabang ke bisi datai benong ngantik ba luar rumah


Babi panjab – benong ke manah endar di intu


Bala VIP baru duduk udahka dibai bejalai niti ruai


YB Datuk Douglas Uggah, Menteri Sumber Asli & Alam Sekitar benong bejaku


YB Robert Lawson Chuat benong nyendia diri deka ngajat musin ranyai


Encik Kalanang, pengari kami ari Nanga Pek baru deka berengkah ngajat ngelingi ranyai


Tu lah keterubah iya aku meda pengawa Gawai Mangkung Tiang ba rumahpanjai, ngelama tu semina bisi meda Gawai Mangkung Tiang rumah mit. Berasai untung ulih enggau urang sarinya, ampit ga meda cara urang ngereja Gawai bansa nya, sambil ampit ga meda gaya rumahpanjai baru zaman diatu. Ba blog sekeda kaban kitai ditu bisi sida nusoi diriempu benong berumah baru, nyau baka trend diatu, mensia mayuh besebut deka ngaga rumah baru.

Gawai Mangkung Tiang tauka ‘ House Warming ‘ tu besai endar reti ba sida ke empu pengawa. Tu meh tanda pemujur pengawa ke udah dikereja betaun taun, ukai nya nyamai berumah baru. Ari segi perengka, bahan kena ngaga rumah diatu makin mar, ari segi cara ngaga enda tau nitih penemu diri empu aja, ukai baka ngaga rumah sebuah sebuah, mesti sebaka runding baru mujur. Dataika ripih bilik, warna cat dinding enggau mayuh utai bukai mesti dikaum baru ngereja.

Nyadi aku meri jaku SYABAS ngagai kita di Rumah Setang, Ulu Babu laban udah mujur, rumah udah tembu lalu ngajih ke kita dia lantang senang, gerai nyamai nguan menua.

Saturday 13 June 2009

Gawai Hari Kedua – Ke Samu, Paku

Formula kami sebilik ngintu Gawai tiap taun di rumahpanjai selalu bakatu, Gawai hari keterubah ngintu ba rumahpanjai diri empu, hari kedua bejalai ngagai rumahpanjai bukai. Kebuah iya bakanya, maya tu lah manah endar alai nemuai ngagai kaban bukai, maya urang bisi dirumah jam urang nadai mindah.

Taun tu kami bejalai ngagai menyadi aku di Lempaong, Betong. Rumah/langkau sida sebilik iya ke semak rumahpanjai dia. Kami nadai niki ke rumahpanjai laban anak aku ke biak meragam mai pulai.

Rumah panjai Lempaong, Betong digambar ari tanju rumah menyadi aku


Angkat ari Betong kami ngetu sekejab ba simpang Spaoh, meli upa lalis ke Laut ke bisi bejual dia. Laban ke udah semak menua Paku aku alu mai kami sebilik ke Nanga Samu, nemuai ngagai kaban/pangan ke sama gawa ba TM. Penundi iya aku ke Samu maya sida Gawai Antu taun 1997, zaman handphone agi mesai lengan (ATUR 450). Diatu nyamai endar sida ditu bisi coverage 013/019.

Berandau di bilik


Maya kami ke di Samu bisi temuai/pengabang ari jauh niki rumahpanjai sida. Kami menyanak kira sejam udah datai, baru ka mutar ke diri bejalai ngagai bilik bukai. Raban ke datai nya ari Sibu, sida nembiak sekula ari Methodist School (ko unggal aku), bala Boys Brigade. Sida iya alu di bai Tuai Rumah bejalai niti ruai ngapus ke rumah baru duduk ba ruai iya empu. Pengabang nya tadi diambat sida serumah ngena gendang, ajat enggau utai bukai meh, enda entu silik peda aku, enggai ke salah tusoi, aku rindang berandau enggau urang bukai maya nya.

Sida di Samu ngantik pengabang niki


Tuai Pengabang dilanggar ngena ai manis


Arapka sida tu udah besai ila agi ingat ke kitai


Kami mina sempat bejalai ngagai dua pintu aja, ukai enggai tama bilik bukai, bisi ga sida mai, tang bala nembiak meda udah semak ka pukul lima lemai, rauh rauh mai pulai, beguai ka mandi sungai.

Thursday 11 June 2009

Gawai Dayak 2009 ba Ng Pek

Agi ka nampung cerita Gawai kami tu tadi laban ati agi dalam “Gawai Mood” tajapan jam diatu kitai nadai agi dalam “Gawai Mode”. Gawai kami taun tu kira di intu baka selama, kala iya rami agi ari ke taun tu leboh maya semua bilik sampal datai.

Ditu ukai aku enggai nusoi semua utai tauka pengawa ke dikereja kami maya Gawai tu tadi tang laban ke enda ingat ngambar sekeda utai tambahka pala endang selalu ngelu maya nya suba, nyadi diatu semina ditusoi secara ngelansa aja.

Lemai 31 May kami ngadu ke piring, semua wakil bilik datai ngagai Ruai ke endur pun Gawai taun tu mai capak mit alai engkah piring. Udah piring tembu dibagi iya alu dibiau, tembu pengawa miring sida ke tuai alu begendang rayah.

Ngadu piring Gawai, capak ke biru tiga iti nya enggi kami


Udah makai lemai kami begelumu ba Ruai Tuai Gawai


Siti ari acara udah ke ngirup Ai Pengayu


Pagi satu haribulan enam tu lah pedis endar ba aku, maya nya mata apin ka enchelak agi ka tindok, pala agi ngelu tang mesti dani laban pengawa Gawai mesti diteruska. Kena ngerak bala pagi ari, bendai enggau tawak dipangkung sambil bejalai niti ruai.

Pengawa ke terubah iya pagi nya ngagai tiang pengingat (bisi ngirup mimit dia), udah nya pengawa meri anak mit mandi, taun tu bisi tiga iko dianjung ke ai, semua lelaki. Udahnya begelumu Ruai urang meri anak mandi (ngirup baru ga ditu). Abis pengawa ba Ruai sida ke meri anak mit mandi, kami lalu mindah ngagai Ruai endur pun Gawai sebedau ngagai ngabang ngagai Ruai bukai ke bisi ngatur pengawa sari nya.

Ba tiang pengingat Ng Pek kena 1.06.2009


Tanda bisi pengawa meri anak mit mandi


Ibu dan anak duduk atas tawak, ngantik Tuai Rumah nata


Begelumu ba Ruai Tuai Gawai


Cikgu Morris Unong bejaku ngelalu ke pengabang


Ba atur Gawai kami ditu rumah dibagi tiga, ianya Ulu, Tengah enggau Ili. Taun tu kena idar sida ba Tengah nyadi ke pun ngintu Gawai, alai kami berengkah begelumu.
Kena taun baru ila, idar puting sepiak kami alai ke pun ngintu Gawai. Nguji meh tu ila, arapka ulih mujur baka ke sida ari group Tengah.

Aku bisi mega maca berita Gawai ari blog ke bukai, rindu endar meda gambar/rita sida. Cara ngintu Gawai sigi enda sebaka ba setiap endur, tang tuju iya sama. Maya Gawai tu meh kena kitai ngingat ke bansa diri, pendiau kitai sambil berami begulai enggau diri sekaban. Maya tu mega kitai patut berandau enggau pangan diri ke cara ngerapat ke kaul, meransang pangan diri enggau diri empu ambika ulih maju sebaka enggau urang bukai.

Sunday 7 June 2009

Seari Sebedau Gawai

Ba bansa kitai, pengrindu maya Gawai tu ukai semina lebuh kitai makai, ngirup begulai enggau pangan/kaban diri. Sama dikerindu mega maya kitai ngereja pengawa kena nyendia ke Gawai baka pengawa mela babi ke udah dibunuh, beketak, betunu, ngelulun asi enggau mayuh pengawa bukai.

Maya bujang kelia, maya apai indai agi bisi, zaman jalai alun apin bisi datai ba pala tangga, hari nyembelih tauka hari sebedau Gawai nyadi nya meh rindu endar, rindu begulai enggau panggan diri bebuti, berandau, betanya ke rita lebuh maya ke apin entu ngelu.

Tang diatu, zaman aku empu nyadi Tuai bilik kami, approach ke dikena aku lain agi. Ukai enda rindu agi ke cara lama, tang enda tulih ke ngereja sekeda pengawanya, tubuh pan nadai entu maioh. Philosophy aku tentang Gawai tu kitai anang entu kelalu stressful ngereja pengawa, relax mimit meh kitai.

Pagi ari nembiak agi relax meda TV


Ruai apin di ancau ke tikai, lemai lagi ngadu ke iya


Sari sebedau Gawai bala ke bisi enggau pulai ka meda Pasar Debak, ke ngirup kupi makai mee di Saratok. Aku empu pan ka meh ke pasar laban dagin, manuk apin dibeli. Target kami mesti pulai baru ke rumah sebedau tengahari, enggai ke nadai ari agi nyendia ke Gawai. Terubah iya kami ke Debak udahnya ke Saratok.

Pasar Debak, bisi berubah – jalai nadai agi road divider, good for motorist


Pulai ari Pasar aku alu beganjuh ke Nanga Tot, bejalai ngagai menyadi aku kia, bisi minta sangkung sida ngelulun asi. Datai dia meda sida agi benong beketak, tang utai ditunu udah mansau, ai semetik pan bisi meh. Enda manah kitai mansa aja maya urang gawa, ngetu dulu ga kami, bejeput ke utai ke udah disirap sida iya dia. Iya agi anggat nya nyamai endar.

Besaup – bala sida di Ng Tot benong beketak


Bisi ka ngemata aja, termasuk aku empu lah


TR Achan anak Ambas, benung ngelulun asi


Kira pukul tiga tauka pukul empat lemai, semua pengawa ditanah patut udah siap, tu meh maya kitai tau berengkah ngemenat ke tubuh ke udah lelak. Pengawa tu selalu iya impromptu, nadai dalam programme tang selalu dikerja. Iya ke endar tu meh maya Gawai berengkah.

Friday 5 June 2009

Nanga Pek's Bloggers

Maya Gawai Dayak tu tadi aku bisi begambar enggau dua iko Blogger ari Nanga Pek, Apaienduq enggau DE Saratok. Kami tiga enda sama bilik, rumah panjai Nanga Pek bisi 14 pintu, aku ngintu bilik no. 1 ba pala tangga ili, Apaienduq ari bilik no. 14 tauka pala tangga ulu, DE Saratok ari bilik tengah. Kami duai Apaienduq sama datai kena aribulan 30 May, DE Saratok taun tu ngintu Gawai di Spuna, Paku ba rumahpanjai mentua iya, tang bisi datai lemai 1 aribulan June.

Gambar dibaruh tu diambi ba bilik sida DE Saratok, mua mirah tanda sama sama udah bulih, endang sigi gaya maya Gawai.

Tiga Bloggers (ari kiba) Pala Tangga, DE Saratok & Apaienduq - sigat magang


Sama dibai begambar (ari kiba atas) Anthony Watt, Christian Entaban, Philip Rofus and Marvin


Bisi mega datai ngabang ngagai rumahpanjai kami kena 1.6.2009 nya blogger Ibankiih @Kirai Rimbas, spesial ba aku laban tu meh terubah iya kami dua Ibankiih betemu, ngelamatu semina berandau dalam dunya siber. Ibankiih tu dijemput aku nemuai ngagai rumahpanjai kami kenyau ari iya agi ba menua Lebanon suba. Maya Gawai tu tadi iya bisi pulai ngagai rumahpanjai iya empu ba Rapong, Debak. Nitih ke tusut kami dua tu sekaban tang nadai kala betemu.

Blogger Ibankiih, mangku anak iya ba Ruai sida Apaienduq


Gaga endar ati laban ulih betemu enggau kaban blogger, semina sayau meh laban blogger Ibankiih enda sempat betemu enggau blogger DE Saratok ke apin datai maya nya suba. Blogger bukai ke bisi ba Nanga Pek maya Gawai tu tadi nya Dr Sebastian, menyadi DE Saratok.

Family gathering, Dr Sebastian (baju biru) duduk di antara bini enggau apai iya


Taun baru ila jangka aku mayuh agi bala ngaga blog, arapka sida bukai ke udah bisi blog madah ngagi kitai awakka ke kitai sama ulih bekunsi berita enggau pangan diri.

Thursday 4 June 2009

Pulai ngintu Gawai 2009

Selamat Gawai ngagai semua, baru datai ari Ng Pek, Rimbas lemai tu tadi. Agi berasai lelak laban udah driba mai muto ngelama 5 jam lebih ari Debak.

Begelumu ba Ruai Tuai Gawai kena 1 June 2009


Pengawa pengerami Gawai kira udah tembu, bala ke datai ari jauh udah ga maioh pulai.

Kami menyanak mupok ari Kuching kena 30 May 2009, jam 5.30 pagi. Bala ipar aku pan bisi mega enggau sama, tu kedua kali sida begulai enggau kami ngintu Gawai di Nanga Pek.

Ngetu ba simpang semak Stabau, ngeluie Balai Ringin, rest sekejab


Kami mansang ngena dua buah kereta, lima iko dalam sebuah muto. Sekali tu kami enda ngetu di Pasar Lachau tauka Sungai Tenggang baka selama tang tama simpang Stabau, jalai ngagai alai urang nupi babi (jalai baru). Dia kami relax kira setengah jam madam injin muto, neju ke iya chelap sambil makai bekal ke dibai ari rumah.

Kebuah ke enda tama ba Lachau tauka Sungai Tenggang ukai enda rindu ke menua dia tang enggai bebalut berebut enggau mensia ti kelalu mayuh ngetu dia, enti kitai duduk ba kedai ngoder mee kadang kadang lain asai panduk sida iya, laban beguai ke urang kelalu rami.

Ba simpang Layar mesti ngetu laban deka ngisi minyak muto, tang sebedau nya kami tama ngagai R & R sepiak kiosk Petronas ngulihka nyamai agi kemi enda ibuh berebut ke agu baka ba stesen minyak. Pemeresi utai dia kira standard biasa, mayuh jamban kedai kupi ba Kuching kamah agi ari nya.

Angkat ari Petronas Betong kami terus ke Nanga Pek nadai agi ngetu, menua pan udah semak. Datai di rumah panjai, barang enda terus diangkut niki, agi diteju ke dalam kereta, kira sejam sida indai iya besapu, ngemop, betepas ke debu baru kami mindah ke barang ke rumah. Kebuah iya laban bilik endang nadai urang diau, kami pan jarang ga ngabas rumah.

Capak Astro, tiap kali datai ke rumah panjai baru masang ba dinding luar


Udahnya baru aku masang capak Astro awakka bisi kena ngerindang nemiak, awakka ke enda kelalu balat begagai sebelah ruai enggai ke digagai ukoi ba tempuan.

Kami menyanak diau ngelima malam dirumah,baru pulai saritu. Tajapan asaika agi belala diau dirumah panjai, kitai mesti pulai ke nengeri, nitih pengawa. Lebuh datai tadi berasai gaga endar ati laban rumah ke ditinggal ngelama lima aritu selamat, nadai apa nadai nama. Bekau ular pan nadai, tang kami bisi nabur ke sulphur semak pintu, nyangka ngasi meh petuanya.

Sulphur ditabur ba mua pintu dapur, kena nyaga ari Tedung


Mayau ke ditinggal pan agi idup, kami bisi mesan ngasuh jiran sepiak meri iya makai. Jambu ke ditusoi aku suba udah nadai agi, abis dikarang sebedau pulai ke menua. Baka ka beganti, diatu pun mango kami udah berengkah bebunga. Jangka aku dua bulan ila bisi dipansut ka ditu gambar buah iya.

Bunga Mango baru pansut


Rita bukai ila nusoi, agi lelak endar. Gambar maya Gawai bisi ga aku ngambi, tang camera aku kadang kadang meragam, mupok dulu, ila becerita baru.